Байраш мәктәбе хәбәр итә

2019 елның 9 октябре, чәршәмбе

Өлкәннәр декадасы кысаларында, Байраш урта мәктәбе укучылары, “Туңган йөрәкләрне җылытыйк” концерт программасы белән  Картлар һәм инвалидлар өчен Тәтеш интернат-йортында булдылар.  Укучылар әби-бабайлар өчен  матур тәбрикләү сүзләре, җыр-биюләр әзерләгәннәр иде. Балалар чыгышлары аша тыңлаучыларга үзләренең йөрәк җылысын җиткерергә тырышты.  Концерт программасы беркемне дә ваемсыз калдырмады – әби-бабайлар кушылып җырладылар, биеделәр һәм һәр чыгышны кайнар алкышлар белән каршылап-озатып тордылар.  Чарадан соң өлкәннәребез ихлас күңелдән бик озак егет-кызларыбызга рәхмәтләр әйтте, ә бу алар,  ягъни безнең яшь буыныбыз өчен  иң зур бүләк булды.