Байраш авылында “Каз өмәсе” бәйрәме булып үтте

2019 елның 7 декабре, шимбә

Авылда халык күпләп кош-корт асрый, мал-туар үрчетә. Бакча эшләре тәмамлану белән шаулап-гөрләп каз өмәләре үтә. Байраш авылы халкы да шулай бер-берсенә ярдәм итеп, үзара тату яши.

Менә шулай Тәнзилә һәм Тәүфыйк Йосыповлар гаиләсендә дә борынгыдан килгән, әби-бабаларыбыздан калган гореф-гадәт буенча  каз өмәсе булып үтте. Җырлы-моңлы, гармунңын сихри тавышына  күмелгән өмә авылдашларны, туганнарны, дусларны бергә җыйды.

Өмәгә килгән, авылның тырыш, җырга-моңга оста хатын-кызлары  халкыбызның берсеннән берсе матур җырларын башкарып, күңелле итеп каз йолыкты.

Ә инде кичен аларның һәркайсы хуҗабикә әзерләгән каз ите, каз шулпасыннан авыз итеп, каз мае белән майланган коймак, бәлеш ашап, чәй эчте.