Тәтеш шәһәренең "Сабый" балалар бакчасы яңалыклары
Көз-иң матур һәм искиткеч чор. Ул безне агач яфракларының ачык төсләре, җылы көннәре белән сөендерә. Бүген "Сабый" балалар бакчасының өлкән-әзерлек төркемендә тәрбияләнүчеләр табигатьтәге үзгәрешләр белән танышу һәм көчле эмоциональ тәэсирләр алу максаты белән көзге паркка экскурсиягә киттеләр. Экскурсия барышында балалар көзнең билгеләре турындагы күзаллауларны төгәлләштерделәр һәм ныгыттылар, үсемлекләрнең торышы һәм тирәлек шартлары арасындагы бәйләнешне билгеләргә өйрәнделәр, барган үзгәрешләрнең сәбәпләрен ачыкладылар. Паркта балалар туган табигатьнең матурлыгына сокланып карадылар, агачларны, куакларны, үсемлекләрне һәм чәчәкләрне карадылар. Агач һәм куакларның бизәлешендә нинди үзгәрешләр булуын билгеләп үттеләр, төрле агачларның яфракларын үзара чагыштырдылар. Балалар уйнадылар, саф, чиста көзге һава суладылар. Балалар бакчасына күңел күтәренкелеге, уңай хис-кичерешләр һәм якты тәэсирләр алып кайттылар!