Габдулла Тукай исемендәге Бөтенроссия нәфис сүз бәйгесе
Г.Камал исемендәге Татар дәүләт академия театры сәхнәсендә 23 нче апрельдә Гала-концерт һәм Габдулла Тукай исемендәге XVI Бөтенроссия нәфис сүз бәйгесенең җиңүчеләрен бүләкләү тантанасы узды. Бу вакыйга бөек шагыйрьнең тууына 140 ел тулуга һәм Россия Федерациясе Театр эшлеклеләре берлегенең 150 еллыгына багышланды.
2026 елгы бәйгенең темасы - " Чәчәкләр китерегез Тукайга...". Районнарда узган әлеге конкурсның беренче этабы 2025 елның 2-31 октябрендә узды. Анда Татарстан һәм Россиянең башка төбәкләреннән 681 мәктәптән 1424 укучы катнашты.
2025 елның 10-12 ноябрендә Казанның «Идел» лагеренда мәдәни-мәгариф форумы узды. Анда конкурсның муниципаль этабында җиңгән 157 бала катнашты.
Конкурсның финалы 2026 елның 20-22 апрелендә М.Сәлимҗанов исемендәге Актерлар йортында узды. Гала-концертка һәм бүләкләү тантанасына иң яхшы нәтиҗәләр күрсәткән 40 катнашучы чакырылды.
Тәтеш кадет-интернат мәктәбенең 8 класс укучысы Даниэль Макаров (җитәкчесе Н.Р.Сиякина) конкурсның барлык этапларын уңышлы узды, форумда катнашты һәм финалга чыкты. Гала-концертта ул «Татар шигъриятен пропагандалаган өчен» номинациясендә җиңгәне өчен Диплом белән бүләкләнде һәм махсус призга лаек булды.
Даниэль һәм аның җитәкчесе Нәфисә Равил кызын бу зур уңышлары белән чын күңелдән котлыйбыз! Аларга алга таба да иҗади җиңүләр телибез!