«Тукай туган телләрдә»

2024 елның 26 апреле, җомга

26 апрель «Тәтеш татар урта гомуми белем бирү мәктәбе» МББУ дә бөек татар шагыйре Габдулла Тукайның тууына 138 ел булуга багышланган «Тукай туган телләрдә» музыкаль-шигъри сәгате узды. Бәйрәм чарасын Тәтеш муниципаль районы Бөтендөнья татар конгрессының җирле оешмасы җитәкчесе, Тәтеш муниципаль районы татар милли-мәдәни үзәге җитәкчесе Асия Ибраһимова ачып җибәрде.

Бәйрәмдә мактаулы кунаклар: Россия Федерациясе агросәнәгать комплексының мактаулы хезмәткәре, «Халыкара хатын-кызлар берлеге» оешмасы каршындагы Татарстан Республикасының рәсми вәкиле, «Колос» ҖЧҖ агрофирмасы һәм «Сафиуллова» крестьян-фермер авыл хуҗалыгы җитәкчесе, Татарстан Республикасы Тәтеш муниципаль районының «Ак калфак» татар хатын-кызлары иҗтимагый оешмасы филиалы җитәкчесе Рима Сафиуллова, Тәтеш муниципаль районының мәгариф бүлеге башлыгы урынбасары Дарья Ромашкина, Тәтеш муниципаль районы мәгариф бүлеге методисты Резеда Гарипова катнаштылар. Районның мәктәпкәчә һәм гомуми белем бирү учреждениеләре укучылары Габдулла Тукай әсәрләре буенча иҗади концерт номерлары белән чыгыш ясадылар. Район шагыйрьләре үзләренең шигырьләрен укыдылар. Чара тантаналы бүләкләү тантанасы һәм Г.Тукай сүзләренә язылган «Туган тел» җырын башкару белән тәмамланды.